भाजपच्या उमेदवार आश्विनी जगताप यांच्या प्रचारार्थ पंकजा मुंडे यांनी चिंचवडमधील अनेक ठिकाणी प्रचारसभा घेतल्या आहेत. यावेळी कार्यकर्त्यांशी बोलताना पंकजा मुंडे म्हणाल्या की, गोपीनाथ मुंडे साहेब जेव्हा पाठीमागे हात बांधून निघाले की लोक त्यांचे मागे निघायचे. मी हात बांधून निघाले तर मलाही त्यांच्यासारखं जमेल का?, मी जिकडे जाईल तिथं तुम्ही माझ्या पाठिमागे याल का?, असा सवाल पंकजा मुंडे यांनी भाजपच्या कार्यकर्त्यांना केला आहे. त्यानंतर आता पंकजा मुंडे या लवकरच भाजपला रामराम करणार असल्याच्या चर्चा पुन्हा नव्यानं सुरू झाल्या आहेत. काही दिवसांपूर्वीच पंकजा मुंडे यांनी फेसबुक पोस्टद्वारे भाजपच्या वरिष्ठ नेत्यांवरील नाराजी व्यक्त केली होती. त्यानंतर आता त्यांनी थेट भाजपच्या कार्यकर्त्यांसमोरच नाराजी व्यक्त केल्यामुळं राजकीय चर्चांना उधाण आलं आहे.
